Sar-i Pol ټاکنیز خبرونه

سرپل (پژواک، ٣٠ زمری ٩٨): په سرپل ولایت کې د امنیتي ستونزو له امله د رایې اچونې له ټولو ۱۴۹ مرکزونو څخه په ۸۱ مرکزونو کې ټاکنې نه ترسره کېږي.
په سرپل ولایت کې د ټاکنو کمېسیون رییس مرتضی عالمي زاده نن په یوه خبرې ناسته کې د دغه مطلب ترڅنګ وویل چې د ولسي جرګې په ټاکنو کې هم په دغه ولایت کې د رایې ورکونې له ټولو ۱۴۹ مرکزونو څخه په ۷۱ مرکزونو کې ټاکنې ترسره شوې وې.
خو عالمي زاده په ټینګار سره وویل چې د ټاکنو د روڼتیا لپاره لازم تدابیر نیول شوي دي.
په ورته وخت کې د سرپل د امنیې قوماندنۍ د امنیت امر عبدالصبور وویل، پولیس د ټاکنو لپاره د ښه امنیت ساتنې هڅه کوي.

سرپل(پژواک، ٢٨ تله ٩٤): د سرپل ولايت د دريو ولسواليو ځينو کارکوونکو له څو مياشتو راهيسې له ولسوالۍ د ولايت تر مرکزه د شته امنيتي ستونزو په سبب له کابلبانک نه تنخوا نه ده اخيستې.
دا دولتي کارکوونکي په ګوسفندي، سانچارک او سوزمه کلا ولسواليو پورې اړه لري چې په يوه مسير کې پرتې دي، دوى وايي چې شاوخوا دوه کاله وړاندې په سانچارک کې د کابلبانک څانګه بنده شوه او له هغه وروسته بانک د کارکوونکو تنخواوې د ولسواليو مرکزونو ته لېږدولې او وېشلې.

مزارشريف (پژواک، ١٨ تله ٩٤): د سرپل نوى والي وايي، که چېرې يې مرکزي حکومت او خلک ملاتړ وکړي نو د دغه ولايت امنيتي حالت به په خپل مديريت ښه کړي.
د سرپل ولايت نوي والي محمدظاهر وحدت د تلې په ١٨مه په بلخ ولايت کې د ده د خدای په امانۍ په وياړ د جوړې شوې غونډې په ترڅ کې پژواک خبري اژانس ته وويل چې د سرپل ولايت امنيتي حالات يې درک کړي او په دغه ولايت کې د شته ستونزو پخلی کوي.
نوموړي زياته کړه چې د دغه ولايت له هر اړخيزو حالاتو سره يې په فکري او رواني توګه ځان چمتو کړی دی.

سرپل (پژواک، ١١تله ٩٤): وسله والو مخالفينو د سرپل د کوهستاناتو ولسوالۍ مرکز کلابند کړى او دا مهال هلته سخته جګړه روانه ده.
د سرپل د ولايتي شورا غړي اسدالله خُرمي پژواک خبري اژانس ته وويل چې وسله والو طالبانو تېره شپه له څلورو خواوو د کوهستاناتو ولسوالۍ پر مرکز بريدونه پيل کړي دي.
د ده په وينا، د جګړې له امله د ولسوالۍ د مرکز مواصلاتي لارې تړل شوې دي.
په کوهستاناتو کې د سيمه ييزو پوليسو يو تن چې نه غواړي نوم يې څرګند شي، هم ورته څرګندونې کوي او وايي چې يواځې د ګنجيا او خوال کلي د دولتي ځواکونو په لاس کې دي.

شبرغان (پژواک، ٢٨ وږى ٩٤): ناپېژاندو وسله والو نن سهار د شبرغان- سرپل د لويې لارې په اوږدو کې پنځه ملکي وګړي تښتولي دي.
د سرپل ولايتي شورا مشر محمد نور رحماني پژواک خبري اژانس ته وويل چې دا پېښه نن سهار شاوخوا اوه بجې رامنځته شوې ده.
سرچينې وويل، د سرپل د مرکز دا څلور اوسېدونکي په يوه ټونس موټر کې سپاره وو چې د سرپل-جوزجان لويې لارې په اوږدو کې د ناپېژاندو وسله والو له خوا وتښتول شول.
خو د سرپل د ولايتي شورا بل غړي محمد حسين مجاهدزاده ويلي چې تښتول شوي کسان د سرپل په مرکز کې د سيداباد هزاره سيمې اوسېدونکي دي چې د وسله والو طالبانو له خوا تښتول شوي.

سرپل (پژواک، ۶ زمرى ۹۴): چارواکي وايي چې وسله والو طالبانو د سرپل د کوهستاناتو ولسوالۍ نيولې ده.
د سرپل امينه قوماندان پاسوال محمد اصف جبارخېل د زمري په ٦مه پژواک خبري اژانس ته وويل چې د کوهستانو ولسوالۍ وسله والو طالبانو نيولې او د ولسوالۍ د امنيه قوماندان او ۱۷ ملي پوليسو په اړه يې معلومات نه لري.
د ده په وينا، دغه ولسوالۍ د سيمه ييزو پوليسو د قوماندان د معاملې په صورت کې سقوط کړى او دغه قوماندان له خپلو ۷ ملګرو سره طالبانو ته تسليم شوى دى.

سرپل (پژواک، ١٢ ورى ٩٤): چارواکي وايي، چې په سرپل ولايت کې د امنيتي پېښو او سېلابونو له امله ١٣ کسانو ته مرګ ژوبله اوښتې ده.
د سرپل امنيه قوماندان پاسوال نورحبيب ګلبهاري د وري په ١٢مه، پژواک خبري اژانس ته وويل، چې په تېرو درېو ورځو کې، د دې ولايت په بېلا بېلو سيمو کې عمليات ترسره شوي، چې په پايله کې يې لسو کسانو ته مرګ ژوبله اوښتې ده.
هغه زياته کړه، چې وسله والو مخالفينو تېره شپه د مرکز اړونده د پوليسو پر امنيتي پوستو بريدونه کړي وو، چې په ځوابي بريد کې درې تنه ووژل شول او څلور وسله وال ټپيان شوي دي.
د نوموړي په وينا، په دې نښته کې درې پوليس هم وژل شوي دي.

سرپل (پژواک ١٩ ورى ٩٣): د سرپل ولايت امنيتي چارواکو لس تنه د ټاکنو ورځې د ګډوډولو په تور نيولي او د دغه ولايت د سوزمه کلا ولسوالۍ لپاره د طالبانو د نومول شوي ولسوال په ګډون يې پنځه طالبان وژلي دي.
د سرپل د ملي امنيت رييس جنرال عزيزالرحمن مايل نن د سې شنبې ورځ يوې خبرې غونډې ته وويل، چې د ټاکنو په ورځ (د وري ١٦مه) د دغه ولايت امنيتي ځواکونو په بېلابېلو سيمو کې د وسله والو د ١١ بريدونو مخه نيولې ده.
د مايل په خبره، د امنيتي ځواکونو په بېلابېلو عملياتو کې د سوزمه کلا ولسوالۍ لپاره د طالبانو د نومول شوي ولسوال په ګډون پنځه طالبان وژل شوي او لس تنه نور شکمن نيول شوي دي.

(پژواک ١٣ ورى ٩٣): وسله والو طالبانو د سرپل د ولايتي شورا يو کانديد له نهو نورو ملګرو سره وژلى او امنيتي ځواکونو د مشرانو جرګې يو غړى د وسله والو مخالفينو له منګولو ژغورلى دى.
د حسين نظري په نوم د ولايتي شورا دغه کانديد له خپلو نهو ملګرو سره دوه ورځې مخکې د جوزجان-سرپل پر لويه لار، له بوغاوي سيمې وسله والو طالبانو وتښتاوه.
د سرپل امنيه قوماندان نورحبيب ګلبهار د وري په ١٣مه پژواک خبري اژانس ته وويل، چې وسله والو تېره شپه د ولايتي شورا ياد کانديد او د هغه ٨ ملګري وژلي دي.

سرپل (پژواک ١١ ورى ٩٣): د حسين نظري په نوم د سرپل ولايتي شورا يو کانديد د وسله والو مخالفينو له خوا وتښتول شو.
د سرپل والي عبدالجبارحقبين وايي، چې دغه کانديد له سوزمه قلعه ولسوالۍ څخه په يوه مسافر وړونکي سراچه موټر کې د سرپل مرکز ته پر لاره و، چې تېر ماښام د وسله والو طالبانو له خوا په لاره کې له موټر ښکته او وتښتول شو.
حقبين پژواک خبري اژانس ته وويل، چې وسله والو طالبانو د بلخاب ولسوالۍ اړوند د ولايتي شورا دغه خپلواک نوماند نامعلوم ځاى ته لېږدولى، خو د خوشي کولو لپاره يې د عالمانو او ځايي سپين ږيرو هڅې روانې دي.